Sa tunga sang mas nagasako nga pagpanghanda para sa Miss Universe Philippines competition, isa pa ka daku nga kadalag-an ang ginselebrar sang Ilongga beauty queen nga si Alexie Brooks — ang paggradwar sa kolehiyo!
Ginpakigbahin sini ang pictures kun sa diin nakasuksok siya sang toga kag bitbit na ang diploma matapos nakuha ang degree nga Business Administration halin sa National University Philippines – Manila.
Isa man ka makatalandog-balatyagon nga mensahe ang gin-share sini sa isa ka Facebook post kun sa diin ginplastar sini ang mga pagpanghangkat nga naagyan agud nga matapos ang iya edukasyon.
“With aspirations as seemingly endless as the horizon, I carried the hopes of my small town on my shoulders since I was young. I emerged from the shadows of a broken home and found a path to a collegiate education, thanks to the gift and talent of sports,” pahayag ni Brooks.
Ginpasalamatan sini ang iya Lola kag Tiya nga nagbulig sa iya amo man ang nangin kabahin sang iya banas: iya pamilya, mga abyan, mentors, teammates, kag ang Ginuo.
“This is merely the prologue, a testament to the indomitable spirit fueled by determination, dedication, discipline, and dreams that span the infinite expanse of the universe,” kabahin pa sang iya post nga “What You Think, You Become.”
Isa si Brooks sa pinakamatunog nga pangalan sa Miss Universe Philippines 2024 competition. Sulod ini sa Top 5 finalists sa Swimsuit Challenge, Top 5 sang Up Close and Personal Interview Challenge, kag nalakip sa Top 3 sang Best in National Costume.
Patigayunon ang coronation night sang Miss Universe Philippines sa Mayo 22 sa Mall of Asia Arena kun sa diin igapasa ni reigning queen Michelle Dee ang korona sa iya successor nga amo ang magatiglawas sang Pilipinas sa international pageant sa Mexico.#
