ILOILO CITY- Ginhangkat sang isa sa sa duha ka abugado ang self-confessed former rebel kag subong government whistleblower nga si Jeffrey Celiz nga magpagwa sang ebidensiya angot sa iya akusasyon nga recruiters ang mga ini sang Communist Party of the Philippines-New People’s Army-National Democratic Front (CPP-NPA-NDF).
Sa interview sang Bombo Radyo kay Atty. Jobert Pahilga, iya ginpahayag nga wala sang mabakod nga ebidensya si Celis nga makatum-ok sa iya nga recruiter gid man ini sang mga rebelde.
Suno kay Pahilga, indi man matuod nga gina-harass ni Pahilga kag ginapakalain ang pamilya ni Celiz.
Dugang pa sang abugado, nagaimbento lang sang istorya si Celiz agud nga matabunan ang iya mga kabutigan para patihan ini sang mga tawo.
Matandaan nga magluwas kay Pahilga, gin-akusahan man ni Celiz nga recruiter sang mga rebelde sanday Atty. Pet Melliza nga ginapahayag nagatrabaho sa Iloilo Provincial Government kag si Reyland Vergara sang Karapatan-Panay.
Nagbalos man sang mainit nga mga akusasyon si Pahilga batok kay Celiz.
Sa interview sang Bombo Radyo kay Pahilga, iya ginpahayag nga wala nagasalalanto ang mga impormasyon nga ginapangbuy-an sa publiko ni Celiz, partikular suno kay Pahilga ang claim ni Celiz bilang covert operative ini sa idalom sang National Intelligence Coordinating Agency (NICA) nga intelligence arm sang militar.
Suno sa abugado,gina-claim ni Celiz nga kabahin na ini sang NICA sang 2015 apang katingalahan kun ngaa nga kinahanglan pa niya nga magsungka sa militar sang 2017 base sa pahayag ni Lt. Gen. Antonio Parlade Jr. sang Armed Forces of the Philippines.
Pahayag pa ni Pahilga, base sa mga pahayag ni Celiz nga wala nagasalanto, mahimo nga may kahilabtanan ini sa kamatayon sang ginbansagan drug lord nga si Melvin Odicta kag mahimo nga gintraidoran man niya si anay Iloilo City Mayor Jed Patrick Mabilog.
