Ginkumpirma sang World Health Organization (WHO) nga may isa ka residente ang Mexico nga napatay bangud sa bird flu strain.
Ini nga 59-anyos nga biktima amo man ang labing-una nga kumpirmado nga human case of infection nga may A(H5N2) subtype sang avian influenza ukon ang virus nga na-report lang anay sa mga pispis.
Abril 24 sang napatay ang amo nga tawo matapos nga nahilanat, nabudlayan magginhawa, nakaangkon sang diarrhea, naglingin ang ulo, kag indi mapahamtang ang kondisyon ang lawas.
Antes pa man nakita ini nga mga sintomas, ini nga biktima ang bedridden na nga daan sa sulod sang tatlo ka semana kag may iban pa nga medical conditions. Makalilibog pa gid para sa otoridad bangud ang biktima ang wala man sang historya sang exposure sa poultry ukon iban pa nga mga sapat.
Matandaan nga Marso lamang sang nag-deklarar ang gobyerno sang Mexico sang outbreak sa A(H5N2) sa isolated family unit sa western Michoacan state, apang sang amo nga tion,wala ini sang dala nga risgo sa malayo nga commercial farms kag wala man sang abiso nga may malain nga epekto sa ikaayong lawas sang tawo.
Antes sini nga report, may iban pa nga kaso sang bird flu nga na-identify naman sa iban nga mga sapat kaangay sang seals, raccoons, bears kag cattle bangud sa ila contact sa infected nga mga pispis.
