Nagpadala ang World Health Organization (WHO) sang mga eksperto sa Democratic Republic of Congo agud imbestigaran ang isa ka “mystery disease” nga amo ang ginatudlo nga rason sang kamatayon sang madamo nga tawo sa isa ka nabaw-ing nga lugar sa pungsod.
Maga-diretso ang health experts sa Panzi nga isa ka lokalidad sa southwestern Kwango province kun sa diin dal-on ang kinahanglanon nga mga bulong kag diagnostic kits agud ma-analisar kun ano ang ginhalinan sang balatian.
Indi pa subong matumod kun viral disease ini ukon bacterial disease apang kabahin ini sa usisaon sang medical research team lakip na ang epidemiologists.
Base sa data sang Ministry of Public Health nga ginpasa sa WHO, may 394 ka mga kaso na kag 30 ka mga napatay sa lokalidad sang Panzi nga 700 kilometros ang kalayuon halin sa kapital nga Kinshasa.
Sa temprano nga bahin subong nga semana, gin-report naman sang local nga otoridad nga may indi matumod nga balatian nga nagpatay sang 143 na ka mga tawo sa ila rehiyon sini lamang nga Nobyembre.
Lakip sa ginpangpatpat nga komon nga sintomas amo ang pagpalanakit sa ulo, pag-ubo, hilanat, sip-on, kabudlay sa pagginhawa, anaemia, kag pagpalanakit sang lawas. May yara man sang na-obserbahan nga abnormal nga pagnubo sa lebel sang hemoglobin sa dugo suno sa provincial health office.
Base sa initial reports, 40% sang mga kaso amo ang kabataan nga edad singko-anyos panubo nga mga maluya na nga daan bangud sa malnutrition.
