Ginlutos kag ginkuhaan sang korona ni World No.1 Carlos Alcaraz ang reigning champion nga si Novak Djokovic sa makahalawat-hawat nga five-set men’s final sa Wimbledon.
Ini ang labing-una nga Wimbledon title sang 20-anyos nga Spanish tennis player sa iya labing-una man nga pagsaka sa finals sang amo nga prestihiyoso nga tennis tournament sa England.
Halos lima ka oras ang ginlawig sang hampang ni Alcaraz antes nalutos ang 36-anyos nga World Number 2 kag Serbian superstar, 1-6 7-6 (8-6) 6-1 3-6 6-4.
Si Alcaraz ang ikatatlo nga pinakabata nga Wimbledon champion sa Open Era kag ini ang ikaduha nga major title sa iya pangalan matapos nga nadag-an man ang US Open sang nagligad nga tuig.
Ang iya kadalag-an bilang rising star amo ang nagbalabag sa beterano nga si Djokovic nga maangkon ang iya ika-24 nga Grand Slam title sa iya nga karera kag ikatatlo kuntani nga major title sa 2023 matapos nadag-an ang Australian kag French Open.
Nahibaluan nga sang katapusan nga nalutos si Djokovic sa Wimbledon, naga-edad pa lamang si Alcaraz sang 10 ka tuig. #
