Nabuhinan ang mga banwa sa probinsya sang Iloilo nga napaidalom sa Wind Signal No. 1 bangud sa Bagyo Wilma.
Sandig sa alas singko sa kaagahon nga weather bulletin subong nga Domingo, Disyembre 7, nakit-an nga nagdasig sang gamay ang bagyo samtang yara na sa Calbayog City, Samar.
Dala sini ang kabaskugon sang hangin nga 45 km/h malapit sa sentro kag pagmadlos nga tubtub sa 75 km/h. Nagahulag ang bagyo pa-nakatundan naaminhan nakatundan sa kadasigon nga 15 km/h.
Yari ang mga banwa sa probinsya sang Iloilo nga napaidalom gihapon sa wind signal no. 1 kun sa diin posible ang mabaskog nga hangin nga may dala nga minimal to minor threat sa kabuhi kag propiedad.
— central kag eastern portion sang Iloilo lakip ang San Dionisio, Estancia, Batad, Carles, Concepcion, Ajuy, Sara, Balasan, Lemery, Barotac Viejo, San Rafael, City of Passi, San Enrique, Anilao, Banate, Dingle, Barotac Nuevo, Mina, Pototan, New Lucena, Santa Barbara, Leganes, Zarraga, Dumangas, Dueñas, Bingawan, Lambunao, Calinog, Janiuay, Badiangan, Cabatuan, Maasin, Alimodian, San Miguel, Leon, Tubungan, kag Igbaras
— bilog nga Capiz, bilog nga Aklan, kag ang northern kag central portions sang Antique lakip ang Patnongon, Sibalom, Barbaza, Valderrama, Pandan, San Jose, Bugasong, Culasi, Sebaste, Tibiao, San Remigio, Libertad, Belison, Laua-An, Hamtic lakip ang Caluya Islands
Duha ka beses naman nga naka-landfall ang bagyo.
Una amo ang sa Hilabaan Island, nga parte sang banwa sang Dolores sa Eastern Samar 10:50 kagab-i samtang ang ikaduha nga landfall natabo sa banwa sang Oras sa Eastern Samar sang 11:10 kagab-i.
Gina-forecast nga magahulag ang bagyo pa-nakatundan nabagatnan naaminhan sa bilog nga forecast period.
Sa forecast track, magalaslas ang mata sang bagyo sa Southern Luzon kag Visayas subong nga adlaw antes ini magtuhaw sa Sulu Sea kag maglabay malapit sa northern Palawan buwas sa aga ukon sa hapon.
Magapabilin ini bilang bagyo samtang yara sa Southern Luzon kag Visayas, apang ginalauman nga magaluya kag mahimo na lamang nga low pressure area kun yara na sa West Philippine Sea.
