ILOILO CITY – Ginpahanugutan na nga makapauli ang driver sang wing van nga nadakpan nga nagpalusot sang makahulubog nga ilimnon sa checkpoint sa Brgy. Bitoon, Jaro, Iloilo City.
Sa interview sang Bombo Radyo kay Police Major Reynante Jomocan, chief of police sang Jaro Police Station, iya ginpahayag nga ang wing van ang may karga nga masobra sa 1,000 boxes nga liquor products kag ini ang ginamaneho ni Wilfredo Magbanua Jr., 33 anyos sang Cabadiangan, Himamaylan City, Negros Occidental.
Suno kay Jomocan, naghalin ang supply sa Bacolod City kag tuyo nga pagadal-on sa isa ka warehouse sa syudad sang Iloilo.
Ginpahayag ni Jomocan nga mahimo nga wala matalupangdan sa iban nga checkpoint ang karga sang wing van bangud nga may yara ini sang karatola nga food products.
Bangud indi man sakop sang Liquor ban sa syudad sang Iloilo ang pag-transport sang makahulubog nga ilimnon, wala na ginpreso ang driver sang wing van.
