TIGBAUAN, ILOILO – Wala sang indikasyon nga may yara sang foul play sa kamatayon sang 16-anyos nga dalagita nga naghikog sa Barangay Supa, Tigbauan, Iloilo.
Sa interview sang Bombo Radyo kay PMaj. Rolando Araño, hepe sang Tigbauan Municipal Police Station, iya ginpahayag nga naka-istorya sa iya si anay medico legal officer Dr. Owen Lebaquin kag ginkumpirma nga wala sang foul play.
Suno kay Araño, apisar nga wala sang foul play sa kamatayon sang biktima, padayon sa gihapon nga ginatipon ang ebidensya agud mahibaluan ang motibo sang paghikog sang dalagita.
Ginalantaw man sang kapulisan nga posible motibo sang biktima amo ang natabo nga sexual intercourse 24 oras antes ang paghikog sini bangud maathag nga may yara sang ‘penetration’ sa iya kinatawo kag may nakita man nga lagob sa abaga sini.
Kun mapamatud-an nga gin-rape ang dalagita, pat-od nga may salabton ang sin-o man nga responsable.
Nagpanawagan man si Araño sa kun sin-o ang may ihibalo sa natabo, makig-angot sa mga kapulisan agud mahatagan sang kaathagan ang kaso sang biktima.
