ILOILO CITY- Posible nga maka-isyu sang Work Stoppage Order ang Department of Public Works and Highways (DPWH) sa contractor sa gina-construct nga Iloilo City- Leganes- Dumangas Coastal Road may kaangtanan sa pagkadisgrasya sang duha ka motorista nga nahulog sa manhole sa Banuyao, La Paz, Iloilo City sang damlag lang.
Sa interview sang Bombo Radyo kay Engineer Jonah Paloma, ang head sang Construction Division sang Iloilo City District Engineer’s Office (ICDEO) sang DPWH, iya ginpahayag nga magapakig- angot sila sa Department of Labor and Employment (DOLE) agud istoryahan ang kapaslawan sang contractor nga Supreme ABF Construction nga magpatuman sang ila Construction Safety and Health Program’ kag Traffic Management Plan sa amo nga proyekto.
Suno kay Engineer Paloma, sa bahin sang DPWH, mahimo nila nga ma-suspend ang trabaho sang contractor tubtob nga ma-comply nila ang ila kakulangan.
Dugang niya, posible gid nga indi na pagbayaran sang ahensya ang contractor kun wala nila na- provide ang serbisyo may kaangtanan sa safety sa construction area nga yara nasaad sa kontrata.
Nahibaluan nga sa manhole, makit-an ang mga nagalabaw nga kabilya sa diin ginbutangan lang sang straw rope ang palibot kag ginhigtan sang caution tape.
Apang, base sa nagakaigo nga safety guidelines, kinahanglan nga may yara sang blinkers sa working area, may yara sang reflectorized warning sign 10 ka metros antes ang manhole, may plastic barrier, kag dapat nga i-expedite ang pagkaayo sang proyekto kag indi pagbayaan nga wala natapos agud malikawan ang disgrasya.
