Nagapangatubang subong sang sampaw-sampaw nga kaso administratibo ang 10 ka mga pulis sang Angono Police Station sa Rizal bangud sa ginaalegar nga pag-aresto sa isa ka working student kag ila pa ini nga ginkawatan.
Ang biktima amo si Nestor Macabenta Jr, isa ka third year criminology student.
Base sa iya panaysasyon, natabo ang insidente sang Nobyembre 10 sang gindakop siya sang mga pulis bangud sa akusasyon nga involved ini sa pagbaligya sang illegal drugs.
Nagapatigayon sang anti-illegal drug operation ang mga pulis sang naglabay si Macabenta sakay sa motorsiklo kag ginparahan ini kag ginpreso sang duha ka bulan.
Pahayag sang biktima, matapos gindakop, ginpangayuan siya sang P50,000 sang mga pulis kag ginkuha pa ang suksok nga singsing.
Napalab-ot ni Macabenta ang reklamo sa National Police Commission gani natumod gilayon ang mga involved nga pulis.
