Gin-aprubahan sang World Bank ang $700-million ukon P40.43 billion nga loan para sa Pilipinas agud nga mapasanyog ang climate resilience sang 18 million ka mga pamilya, partikular na sa mga lugar nga pigado kag mataas ang risgo sa climate-related hazards.
Sa isa ka opisyal nga pahayag, ginpahibalo sang World Bank nga gin-aprubahan sang ila board of directors ang loan para sa Philippine Community Resilience Project, nga mas kilala sa tawag nga “Pagkilos.”
Suno sa World Bank, ang proyekto ginatuyo nga maghatag proteksyon kag suporta sa mga pumuluyo nga nagapangatubang sa risgo sang mga natural nga katalagman.
Ginatuyo man sini nga matipigan kag mapasanyog ang kabuhi sang mga kubos, mga katutubo (indigenous peoples), kababainhan, kag mga benepisyaryo sang conditional cash transfer program sang gobyerno.
Ginpunto pa sang bangko nga ang Pilipinas yara sa pinakauna nga puwesto sa World Risk Index bangud sang kataas sang risgo kag exposure sini sa mga malala nga kalamidad kaangay sang bagyo, pagbaha, kag paglinog nga nagabalik-balik kada tuig.
