Gin-flag sang World Bank ang estado sang Pilipinas nga may pinakamataas subong nga balayran sa kuryente sa bilog nga Southeast Asia.
Ini ang kasunod sang report sang Department of Energy (DOE) nga nagalab-ot na ang average power price sa Pilipinas sa P12.43 per kilowatt-hour sang Hunyo. Lapaw ini sang P0.09 per kWh sa average rate sang Singapore.
Gin-angot sang ahensya ang mataas nga electricity costs sa nagapadayon nga supply constraints ilabi na sa Visayas kun sa diin may power plant outages.
Suno sa World Bank, indi lamang ang mga panimalay ang naapektuhan sang mataas nga sukot sa kuryente kundi pati man ang mga negosyo.
Bangud sini, nagasaka man ang presyo sang pagkaon, transportasyon kag iban pa nga mga serbisyo, samtang nagaluya ang abilidad sang Pilipinas nga makapang-engganyo sang mga investment kag makahimo sang mas madamo nga maayo ang sweldo nga mga obra.
Gintudlo sang World Bank nga isa sa mga nagapanguna nga rason sang mahal nga kuryente amo ang mataas nga gasto sa power generation, mga daan nga power supply agreements, kag mga problema sa transmission system.
Bisan nagabulig ang ini nga mga kontrata sa pagpasiguro sang padayon nga suplay sang kuryente, ginsiling sang World Bank nga may mga kondisyon ini nga nagapugong nga madasig mapasa sa mga konsumidor ang bisan ano nga pagnubo sang gasto sa pag-produce sang kuryente.
Ginadugangan pa ini sang mahal nga emergency power purchases kun may kakulangan sa suplay kag sang limitado nga kompetisyon sa power generation sector.
Ginpabutyag sang World Bank nga importante ang pagpanubo sang presyo sang kuryente kag pagpaayo sang suplay paagi sa pagpasangkad sang renewable energy, pagmodernisa sang transmission grid, kag pagpalig-on sang kompetisyon sa sektor.
Suno pa sa World Bank, kon mahimo ini, mapadasig ang pagtubo sang ekonomiya, mapabakod ang manufacturing sector, makahatag sang mas madamo nga obra, kag makabulig sa pagpahagan-hagan sang kapigaduhon kag indi patas nga kahimtangan sa pungsod.#
