Ginpanugyanan sang World Bank ang gobyerno sang Pilipinas nga magpatigayon sang digital government-to-person (G2P) payments, pinaagi sa pag-tap sa iban pa nga financial services providers kaangay sang e-wallets agud mapadasig ang pagpanagtag sang ayuda ukon cash assistance sa tion sang krisis.
Nagakadapat man suno sa World Bank nga may yara sang foundational ID system agud mangin mahapos ang pag-identify kag pag-verify sang mga data nga ginapasa sang mga beneficiaries.
Sa ila report nga may tigulo “Toward more Accessible and Inclusive Social Assistance Delivery: A Geospatial Analysis in the Philippines,” ginpahayag sang Government-to-Person Initiative sang World Bank nga sang tion sang hugot nga pagpatuman sang lockdown bangud sa coronavirus pandemic sang 2020, ang pagpatuman sang social amelioration program (SAP) ang nag-angkon sang problema bangud sa kakulang sang digital payments infrastructure para sa mga recipients.
Dugang pa, ang kakulang sa national ID system kag ang manubo nga bank account ownership ang nakaupang man sa pagpanagtag sang financial assistance.
Suno sa Washington-based multilateral lender, sa tion sang pandemya nga naeksperyensyahan sa nagkalain-lain nga bahin sang kalibutan, ang mga pungsod ang makahatag sang insakto nga cash transfers sa tion nga may yara ang mga ini sang foundational ID systems nga makatumod kag maka-verify sang data sa mga benefeciaries.
Ini man ang isa sa mga rason sa pagmando ni Presidente Rodrigo Duterte kay National Economic and Development Authority (NEDA) chief Karl Kendrick Chua nga padasigon ang pagpatuman sang Philippine Identification System (PhilSys).
Ang Philippine Statistics Authority, amo ang in-charge sa PhilSys sa idalom sang pagdumala sang NEDA.
Sa subong, nagdangat na sa 57 million ka mga Filipino ang naka-sign up para sa national ID program.
