Nakuha sang Pilipinas ang commitment sang World Bank nga buligan ang sector sang agrikultura sa pungsod amo man ang human capital development.
Suno kay Finance Secretary Ralph Recto, ginpasalig ini sang bangko sa natabo nga high-level dialogue sa top officials sang World Bank Group (WBG) sa Washington DC ang Oktubre 22.
Natabo ang pagsinapol sa sidelines sang WB – International Monetary Fund Annual Meetings sa amo nga state sa Estados Unidos sang Amerika halin sang Oktubre 22-25.
Ginpangunahan ini ni Regional Vice President for East Asia and the Pacific Manuela Ferro kag nagpasalig nga mangin tayuyon ang mga suporta sa proyekto nga mapasaka sang productivity kag income sang Filipino farmers.
Ginpromisa man sang World Bank nga buligan ang pag-modernize sang agriculture sector para nga mas mangin commercially-viable kag export-oriented.
Sa bahin ni Recto, gin-abi-abi sini ang assistance kag ginplastar nga ang pagpasangkad ang sini nga sektor ang magapahagan-hagan sang inflation kag magatib-ong pa sang economic growth.
Ginkilala man sang World Bank ang investor confidence sa Pilipinas nga mabaskog gihapon bangud sa business-friendly reforms.
Ginpahayag ni Recto nga daku ang potensyal sang Pilipinas nga mag-integrate sa global supply chain sang high-value manufacturing ilabi na sa semiconductor industry.
Ginhingyo man sini sa World Bank nga maghatag sang dugang nga assistance sa pagpabakod pa sa cybersecurity sang Pilipinas.
Nahibaluan nga as of June, ang International Bank for Reconstruction and Development (IBRD) sang World Bank amo ang third-largest official development assistance (ODA) partner sang Pilipinas nga may assistance nga lab-ot sa $8.84 billion.
Sa amo nga meeting, kaupod ni Recto sanday Agriculture Secretary Francisco Tiu Laurel Jr.; Finance Undersecretary Domini Velasquez; National Treasurer Sharon Almanza; WBG Alternate Executive Director Erwin Sta. Ana; kag OIC Assistant Secretary Donalyn Minimo.#
(Photo Courtesy: DBM)
