Nag-abante na sa quarterfinals kag natalana nga mag-atubang sa Morocco ang powerhouse team kag 2018 champions nga France matapos ginlutos sa Round of 16 ang Paraguay, 1-0.
Isahanon nga naka-goal para sa French team ang superstar kag captain nga si Kylian Mbappe sa ika-70 nga minuto.
Bangud sa goal ni Mbappe, patas na sila sang 39-anyos nga captain nga si Lionel Messi sang Argentina nga may pito ka goals subong nga tournament samtang padayon ang karera para sa Golden Boot.
Ginpatigayon ang matchup sang Paraguay kag France sa Philadelphia kun sa diin may Extreme Heat Warning subong nga adlaw.
Magabiya naman ang Paraguay sa World Cup 2026 nga nahimo ang isa sa pinakadaku nga upset matapos ginlutos nila via penalty shootout ang four-time champions nga Germany sa Round of 32.
Antes ang match-up sang France kag Paraguay, nakakuha na sang pwesto sa quarterfinals ang Morocco matapos gindominar ang hampang batok sa Canada, 3-0, sa imbukada nga hampang sa Round of 16.
Naka-brace si Azzedine Ounahi sa 50th kag 82nd minute kag gindugangan pa ni Soufiane Rahimo sa injury time nga amo ang nagselyo sang kadalag-an sang Morocco batok sa co-host nation.
Ini na ang ikaduha nga sunod-sunod nga edisyon sang amo nga football tournament nga nakatapak ang Morocco sa last eight matapos nakahimo sang maragtas sang nagligad nga 2022 bilang una nga African nation nga nakalab-ot sa semifinals.
Sa ila kadalag-an batok sa Canada, sila naman liwat ang una nga African nation nga nakalab-ot sa quarterfinals sa masobra isa ka bes.#
