Gintumod sang World Health Organization (WHO) ang Pilipinas nga may mahinay nga proseso sang contact tracing kun Coronavirus Disease 2019 ang pagahambalan.
Suno kay Dr. Socorro Escalante sang WHO Philippines, kinahanglan pa sang dugang nga pagpaninguha ukon effort agud nga mapadasig ang contact tracing sa mga may yara sang exposure sa sin-o man nga COVID-19 positive.
Kinahanglan nga ang contact tracing ang ipatigayon sa sulod lang sang duha ka adlaw sa tion nga magpositibo sa COVID-19 ang isa ka pasyente.
Ini ang proseso agud mahibalo-an kun sanday sin-o ang na-palapitan ukon na-istorya sang COVID-19 patients agud gilayon nga ma isolate kag indi na maglaton pa sa iban nga tawo ang virus.
Apang pahayag sang WHO, masami nga ginahulat sang Pilipinas ang test results sang COVID-19 case antes makapatigayon sang contact tracing sa diin nagaguwa ang resulta pito pa ka adlaw ukon isa ka semana.
Ginarekomenda sang World Health Organization nga may yara gid sang contact tracer sa kada 800 ka mga tawo, buot silingon, dapat may yara sang indi magnubo sa 135,000 ka mga contact tracers ang pungsod.
Apang sa subong, may yara lang sang 50,000 ka mga contact tracers ang Pilipinas nga maka-akomodar sang 100 million nga mga Filipino.
Magluwas sa kakulang sang contact tracers, kulang man ang pungsod sa “meticulous tracking” ukon pagkamaid-id.
Nahibaluan nga ang una nga tatlo ka kaso sa pungsod nga lunsay mga dumuluong halin sa Wuhan, China ang naka-interact sa 1,195 ka mga tawo.
Apang, 552 lang ang na interview kag na obserbahan kag kapin sa 60 sa ila ang nagpakita sang sintomas sang COVID-19.
