Nagbubo ang mensahe sang kasubo kasunod sang hinali nga kamatayon sang 24-anyos nga atleta sang Kenya nga naga-uyat subong sang marathon world record.
Ini amo si Kelvin Kiptum nga napatay sa aksidente sa dalan sa Eldoret, Kenya samtang kaupod man sini ang iya coach nga si Gervais Hakizimana.
Nagguwa sa imbestigasyon nga si Kiptum ang naga-drive sang salakyan nga Toyota Premio apang nadulaan ini sang kontrol kag nakabunggo sa kahoy.
Gab-i sang natabo ang amo nga aksidente kun sa diin may isa pa gid ka tawo nga nakaangkon man sang seryoso nga mga samad sa lawas.
Natabo ang insidente samtang nga yara pa si Kiptum sa tuktok sang iya karera kun sa diin nakadalagan ii sa tatlo ka major marathons sa kalibutan kag ini nga tatlo ang nalakip tanan sa pito nga fastest of all time!
Siya man ang isahanon nga lalaki nga naka-break sang 2:02 mark sang tatlo gid ka beses.
Mangin si World Athletics President Sebastian Coe ang nagsiling nga isa ka tumalagsahon nga atleta si Kiptum kag may yara sang maayo nga legasiya sa patag sang athletics.
Ginasiling nga antes natabo ang aksidente, plano kuntani ni Kiptum nga makilala bilang labing-una nga atleta nga makadalagan sa marathon sang indi lampas sa duha ka oras sa race conditions sa Rotterdam sa Abril.
Handum man kuntani sini nga masaksihan sang iya pamilya, abyan kag pungsod ang iya nga Olympic debut sa Paris sa maabot nga Hulyo.#
