ILOILO CITY – Ginkakibot sang sports world ang pag-anunsiyo sang tennis world star nga si Roger Federer nga magaretiro na ini pagkatapos sang Laver Cup sa London sa masunod nga semana.
Ang 41 anyos nga Swiss player nga nagdaog sang 20 ka Grand Slam titles kag ginakabig sang kadam-an nga best player ang wala nakahampang sa match halin sang nagligad nga tuig sang Wimbledon.
Suno kay Federer, sa sulod sang tatlo ka tuig, madamo ang iya naangkun nga injuries kag nagpaidalom sa madamo nga surgeries.
Gintinguha-an man niya nga magbalik sa full competitive form apang indi na mahimo sang iya kapabilidad kag limits.
Nagdangat sa masobra sa 1,500 matches ang iya nahampang sa sulod sang 24 ka tuig.
Ang Laver Cup sa masunod nga semana ang mangin katapusan niya nga Association of Tennis Professionals event.
Si Federer nga amo ang nag-dominate sang men’s tennis matapos nga nakuha niya ang iya pinakauna nga Grand Slam title sa Wimbledon sang 2003 ang napun-an sang injuries sang nagliligad nga mga tinuig.
Ginpaidalom na ini sa tatlo ka operasyon sa tuhod sa sulod sang duha ka tuig kag ang iya katapusan nga competitive match amo ang quarter-final defeat batuk sa Polish nga si Hubert Hurkacz sang 2021 Wimbledon.
Gin-anunsiyo ni Federer ang iya plano nga pagbalik sa tour sang nag-team up ini sa iya long-time rival kag abyan nga si Rafa Nadal agud nga maghampang sang doubles sa Laver Cup sa London.
Nagaplano man ini nga maghampang sa Swiss indoors tournament sa Basel.
