Ginhangkat sang world’s richest person nga si Elon Musk ang presidente sang Russia nga si Vladimir Putin sa isa ka single combat.
Ang at stake sa amo nga away? Ukraine.
Ginhimo sang nasambit nga American Billionaire ang hangkat sa Twittter.
Wala pa ini na-kontento kag nag-follow up pa sa isa ka tweet nga nagpamangkot kay Putin kun ginabaton sini ang iya pagpanghangkat.
Gin-tag pa sini ang Kremlin sa amo nga post.
Si Musk amo ang chief executive officer sang American electric vehicle manufacturing company nga Tesla kag founder sang aerospace company nga SpaceX.
May isa pa ka follower nga nagkomento nga basi nagalahog lang ang bilyonaryo, apang sabat ni Musk, seryoso siya sa iya nga tweet.
Wala pa sang insigida nga sabat halin sa Kremlin.
Una diri, ginpahayag na sang 50-anyos nga billionaire ang iya suporta sa Ukraine, amo man ang pagtanyag sang simpatiya sa mga tawo sa Russia nga wala man naluyag sa gyera.
Nagbulig man ini sa Kyiv paagi sa pag-active sa Starlink internet service sa Ukraine kag pagpadala sang equipment para sa connectivity sa mga lugar nga ginpang-atake sang Russian military.
Sa pihak nga bahin, ang 69-anyos nga presidente sang Russia ang isa man ka judo blackbelt kag naka-co-author man sang libro nga tungod sa sports. May tig-ulo ini nga ‘Judo: History, Theory, Practice’.Siya man ang honorary president sang International Judo Federation sang 2008, apang nasuspinde bangud sa iya nangin role sa away batok sa Ukraine. ##
