ILOILO CITY – Masobra sa tatlo ka tuig bag-o matapos ang documentary nga PÁTOK / The Mountain Carvers.
Sa interview sang Bombo Radyo kay Emmanuel Lerona, Writer/Director sang nasambit nga documentary, iya ginpahayag nga tuig 2015 pa sang gin-umpisahan niya kaupod sang iya team ang paghimu sang PÁTOK / The Mountain Carvers.
Suno kay Lerona, ang tinaga nga patok ang isa ka madalum nga Hiligaynon word nga nagakahulugan sang paghimo ukon pagdihon apang sa para sa mga indigenous people sa Gen. Fullon, San Remigio, Antique, ini ang nagakahulugan sang proseso sang paghimu ukon pagdihon.
Ginpahayag ni Lerona nga sa Gen. Fullon, San Remigio, Antique, makita ang rice terraces kasubong sa Banaue nga ginakabig manggad sang Pilipinas.
Ang rice terraces sa nasambit nga lugar suno sa natungdan ang manu-mano nga ginhimu sang mga katigulangan sang Iraynon Bukidnon sang Gen. Fullon nga isa sa mga bukid nga barangay sa San Remigio.
Sa nasambit nga documentary suno kay Lerona, pagatalakayon ang kultura, pangginawi, pagpangabuhi kag ang natuhoy sa maragtas sang rice terraces nga nagalapad sang masobra sa 600 heactares.
Indi nangin mahapos ang proseso suno kay Lerona bag-o natapos ang documentary nga isa ka educational material kag ginkilala sang National Commission for Culture and the Arts kag Commission on Higher Education.
Sa Oktubre 19, pormal nga ipaguwa sa sinehan sa syudad sang Iloilo ang nasambit nga documentary.
