ILOILO CITY – Igadeklara nga yara na sa blue alert status ang Western Visayas sa Lunes, Disyembre 2.
Ini ang suno sa Office of the Civil Defense (OCD) bilang pagpanghanda sa posible epekto sang bagyo nga si Tisoy sa rehiyon.
Ang blue alert status ang nagakahulugan nga yara sa 24/7 ang mga operation centers sa bilog nga rehiyon sa diin may yara sang nagakaigu nga mga pasilidad sa tagsa ka sentro.
Dapat nga may yara man sang mga nurses kag doctors.
Sa interview sang Bombo Radyo kay OCD6 Regional Director Roberto Nuñez, iya ginpahayag nga ini ang makabulig agud mapadasig ang ‘response’ pinaagi sa command, control, coordination kag komunikasyon sang mga ahensya sang gobyerno agud nga mapadasig ang paghatag sang bulig sa mga apektado sang bagyo ilabi na sa Northern Iloilo.
Suno kay Nuñez, bisan ang OCD ang handa naman bangud may yara sila sang mga habol, generator set, chain saw kag iban pa gid nga mga equipment nga mahimo ibulig sang mga ‘uniformed personnel’ sa tion sang emerhensya.
Dugang pa sang natungdan, luyag niya nga ‘zero casualty’ ang Western Visayas, kag indi niya luyag mabatian nga may yara sang napatay bangud sa kakulangan sang abiso nagikan sa Local Government Unit (LGU).
Ginpanawagan man sang opisyal sa mga pumuluyo nga sa tion sang evacuation, unahon lang ang mga importante nga dokumento kag indi na magpangduha duha pa sa pagbiya sa balay agud malikawan ang disgrasya.
Ini ang ginpahayag ni Nuñez kadungan sang ginpatigayon nga Pre-Disaster Assessment meeting kaupod ang nanari-sari nga ahensya sang gobyerno.
Kabahin sa mga nagtambong amo tiglawas halin sa Office of Civil Defense 6, Iloilo City Disaster Risk Reduction and Management Office, Regional Disaster Risk Reduction and Management Office, Department of Interior and Local Government, Philippine National Police, Philippine Army, Philippine Coast Guard, Philippine Atmospheric Geophysical Astronomical Services Administration, Mines and Geo-Sciences Bureau, kag Provincial Disaster Risk Reduction and Management Council kag yara man ang mga volunteer groups.
