Ginakabig sang Western Visayas Alliance of Transport Cooperatives and Corporations, Inc. (WVATCCI) nga isa ka dako nga bulig ang inisyatibo nga pagpakilala sang mga electric jeepneys sa transport cooperative kag mga korporasyon nga interesado sa pag-angkon sang mga yunit.
Ini kasunod man sa paglunsar sang e-jeep initiative sa Iloilo ni former Ilocos Sur Governor Chavit Singson.
Sa interview sang Bombo Radyo kay Rizalito Alido, presidente sang Western Visayas Alliance of Transport Cooperatives and Corporations, Inc., iya ginpahayag nga ang tikang ang makahatag sang oportunidad sa mga transport groups ilabi na sa pagpasangkad sang Public Transport Modernization Program (PTMP) sang gobyerno.
Suno kay Alido, tuyo sang WVATCCI kag LTFRB Region 6 nga ipakita ang suporta para sa modernization program, ilabi na nga ang syudad sang Iloilo ang una nga nakakuha sang approval para sa enhanced Local Public Transport Route Plan (LPTRP).
Ginabanta 250 ka mga opisyales gikan sa nagkalain-lain nga transport cooperatives kag corporations sa bug-os nga rehiyon ang nagpasakop sa nasambit nga inisyatibo, kaupod ang mga tiglawas gikan sa city and provincial governments sang Iloilo kag pila ka law enforcement agencies.
