ILOILO CITY – Ginpaandaman sang Western Visayas Medical Center (WVMC) ang publiko batuk sa peke nga RT-PCR test results nga may logo sang nasambit nga ospital kag sang Department of Health (DOH).
Ang peke nga RT-PCR result ang may mga pirma sang mga nagapangalan nga sanday Arriane Sibal, Abigail Joy Pastolero, Andres Miranda, kag Pierre Layson.
Sa interview sang Bombo Radyo kay Dr. Stephanie Abello, chief pathologist, iya ginpahayag nga gin-presentar sa ila sang isa ka eskwelahan ang amo nga dokumento apang indi lang sini mapat-od kun empleyado ukon estudyante ang nagpasa sini sa isa ka nurse.
Suno kay Abello, sa iya pagkahibalo, nag absent sang madugay nga tion ang amo nga persona kag ginpahayag nga nagmasakit ini sa diin mahimo nga ginpangitaan siya sang RT-PCR test result.
Kun indi pamilyar ang tawo sa nasambit nga dokumento, makahambal ini nga lehitimo ang amo nga resulta.
Pahayag niya, ang mga pangalan nga nakabutang sa dokumento ang indi empeleyado sang WVMC.
Dugang pa sang natungdan, isa pa lang ka peke nga resulta ang naglab-ot sa ila kag nagapangabay ini nga kun may yara sang may nahibaluan nga nagapang-hatag fake result, idangop gilayon sa mga otoridad.
Nagakahangawa subong ang nasambit nga ospital bangud mahimo nga ilugon man ini sang iban.
