ILOILO – Duha ka mga ospital ang ginapili-an sang Philippine College of Surgeons Panay Chapter nga mangin COVID-19 Hospital sa Iloilo.
Ini amo ang Western Visayas Medical Center sa Mandurriao, Iloilo City kag West Visayas State University Medical Center sa LaPaz, Iloilo City.
Sa interview sang Bombo Radyo kay Dr. Roy Joseph Trinidad, Presidente sang Philippine College of Surgeons Panay Chapter, iya ginpahayag nga indi mahimo nga impunon ang mga COVID-19 patients sa mga pasyente nga may lain nga balatian.
Suno kay Trinidad, ang iban nga mga ospital sa syudad kag probinsya ang itigana para sa mga pasyente nga may yara sang iban nga balatian.
Pahayag niya, ang Western Visayas Sanitarium sa Sta. Barbara, Iloilo ang pagabutangan sang mga non-critically ill nga mga Persons Under Monitoring kag Persons Under Investigation.
Nagaapelar man ang mga doktor sa nga pumuluyo sang probinsya kag syudad sang Iloilo nga indi pag ipakanubo ang mga medical staff nga naga atipan sa mga persons under investigation kag covid 19 patient bangud linya ini sang ila trabaho nga atipanon ang mga pasyente.
