ILOILO CITY- Untatan sang Western Visayas Medical Center sub-national laboratory ang pagbaton sang mga specimen sa sulod sang tatlo ka adlaw.
Sa interview sang Bombo Radyo Iloilo kay Dr. Marie Jocelyn Te, Medical Coordinator sang Emerging and Re-emerging Infectious Diseases sang Department of Health 6, iya ginpahayag nga mismo si Dr. Stephanie Abello, chief pathologist sang Western Visayas Medical Center sub-national laboratory ang naghingyo sini agud matatapan ang mga backlogs sa COVID-19 testing.
Suno kay Dr. Te, sa tion nga maaprubahan, magasugod ang indi pagbaton sang specimen sa Hulyo 17,Byernes tubtob Hulyo 18,Domingo.
Apang gin-athag ni Te nga sa sulod sang tatlo ka adlaw, mahimo naman nga i-reroute sa iban nga testing laboratory sa rehiyon 6 nga amo ang masunod: Teresita Lopez Jalandoni Provincial Hospital Molecular Laboratory sa Silay City, Negros Occidental; Corazon Locsin Montelibano Memorial Regional Hospital (CLMMRH) sa Bacolod City; kag Qualimed Hospital sa Iloilo City.
May kaangtanan naman sa tatlo ka mga RT-PCR machines sa Western Visayas Medical Center sub-national laboratory nga wala ginagamit bangud indi compatible sa test kits, ginpahayag ni Te nga gina-fast track na ang pag-purchase sang mga test kits nga compatible sa mga machines agud mapadasig ang pagprosesos sang mga specimen kag malikawan ang backlogs.
Nahibaluan nga sa 5000 ka mga backlogs, may nabilin pa nga masobra sa 2,000 ka mga specimen ang wala pa napaidalom sa test.
