Wala na sang backlogs ang Western Visayas Medical Center – Subnational Laboratory (WVMC-SNL).
Sa interview sang Bombo Radyo kay Dr. Stephanie Abello, chief pathologist sang nasambit nga laboratoryo, iya ginpahayag nga nagapabilin sa 48 hours ang average nga turn around time sang laboratoryo ukon ang pagpagwa sang resulta sang swab test umpisa sang nabaton ang specimen.
Suno kay Abello, kun ma-delay ang pagpasa sang specimen, delayed man ang pagpagwa sang resulta.
Una na nga gin-abisuhan sang WVMC-SNL ang mga disease reporting units nga i-imonitor sang maayo ang ila nga email address bangud direkta diri nga ginasend ang COVID-19 test results.
May nag-abot nga RNA extraction machine sa talatapan kag ginaplanuhan nga i-install sa Oktubre 5 kag ginalauman nga makapadasig pa sang turn around time.
Nagapabilin man sa 1,500 ang capacity sang laboratoryo ukon ang specimen nga sarang maproseso sa sulod sang isa ka adlaw.
Gin-athag man sang talatapan nga wala sang bayad COVID-19 test sa WVMC-SNL.
