ILOILO CITY– Ginpanindugan sang pamunu-an sang Western Visayas Medical Center Sub-National Laboratory nga wala sang human error sa pagpaguwa sang resulta sang pasyente nagpositibo sa Coronavirus Disease 2019 nga taga Igbaras, Iloilo.
Sa interview sang Bombo Radyo kay Dr. Stephanie Abello, chief pathologist sa nasambit nga hospital, iya ginpahayag nga wala sang natabo nga pagbayluhanay sang specimen.
Suno kay Abello, organisado ang laboratory kun sa diin sa tube nga ginabutangan sang specimen, nakalakip ang pangalan kag iban pa nga detalye sang pasyente.
Ginpahayag ni Abello nga may yara man sang quality control system nga nagapasigurado nga husto kag masaligan ang ginapaguwa nga resulta sang COVID-19 test.
Sa tion nga may yara sang naga-abot nga mga specimen suno kay Abello, ila ini gina-check sang maayo kun bala nagasanto sa listahan ang numero sang samples lakip na ang pangalan sang mga pasyente kag pasunod ini nga ginabutang sa rack agud suguran ang proseso sang examination.
Sa tanan nga stages sang testing, may yara sang ginahimo nga validation kag verification rason nga nahatagan sang proficiency sang Research Institute for Tropical Medicine ang Western Visayas Medical Center.
