ILOILO CITY – Naga-average sa tatlo ka kliyente sa tagsa ka adlaw ang nagapangayo sang bulig sa Western Visayas Psychosocial Support for Covid-19.
Sa Good Morning Philippines program, ginpahayag ni Francis Ray Subong, registered guidance counselor kag Board of Director sang Philippine Guidance and Counseling Association, nga nanari-sari nga psychosocial services ang kinahanglan sang tagsa ka kliyente.
Suno kay Subong, ang iban ang nagapangayo sang mental health advise, may nagapangayo sang referral kag may mga Overseas Filipino Workers man nga nagpangayo sang bulig bangud sa pagbatyag sang kahangawa para sa seguridad sang ila pamilya.
Ginpahayag ni Subong nga nga ang iban sa ila kliyente ang may pre-existing mental health conditions kag nagapangayo sang pyschosocial support samtang ang iban naman ang nakabatyag sang depresyon bangud sa ginapatuman nga lockdown.
Ang social media suno kay Subong ang isa man sa mga rason sang mental health disorder, depende kun paano ini gamiton.
Ang iban suno sa natungdan ang nagapalapta sang negatibo nga post kag sala nga impormasyon samtang may iban naman nga nagagamit sang social media para sa human trafficking.
Bangud diri, daku ang katungdanan sang mga ginikanan kag nagaserbe nga guardian sa pagbantay kag pagpahangop sa ila kabataan kun paano makalikaw sa mental health disorder tuga sang social media.
Ang importante suno sa natungdan amo ang support system gikan sa pamilya kag abyan, pagbaton sa ano man nga pagbag-o sa kabuhi kag ang himpit nga pagpangamuyo.
