Gindala pauli sang West Visayas State University College of Law Vox Populi Moot Team, indi lang ang ila kadalag-an kundi ang ila eksperyensya sang pagpakita sang ila abilidad kag kaalam sa international stage.
Ini matapos gindeklarar ang team bilang First Runner-Up sa 30th Stetson International Environmental Moot Court Competition, nga ginpatigayon sa Stetson University College of Law sa Gulfport, Florida,USA.
Ang team ginabug-usan nanday Therese Diane Germinanda, Jose Emilio Luis Combatir, kag John Patrick Palquiran.
Ang ila coaches amo sanday Lowell Fredrick Madrileño, Judge Lowell Fredrick Madrileño, Atty. Regina Johanna V. Gustilo kag Prosecutor Federic Loise Regencia, sa suporta man ni Dean Ian Thomas M. Besana.
Suno sa ila, makahulugan ang ila pagpasakop bangud una ini nga tion nga nag-intra ang College of Law sang WVSU sa amo nga kompetisyon ilabi na nga lima pa lang ka tuig humalin sang ginbuksan ang amo nga kolehiyo.
Pahayag nila, labaw sa tropeo, ang kompetisyon nagtakos sa abilidad sang team nga mag-atubang sa pressure kag maghambal sa atubang sang mga hurado.
Nangin repleksyon naman sang ila pagtutom kag preparasyon ang ila mga nabaton nga pasidungog matapos ginkilala si Germinanda bilang Best Speaker sa Final Round kag 3rd Best Speaker sang Preliminary Rounds samtang si Palquiran naman ang nakakuha sang 9th Best Speaker distinction.
Para sa team, ang ila eksperyensya nga itiglawas ang Pilipinas sa global platform ang isa ka kadalag-an nga dala nila sa adlaw-adlaw kag sa palaabuton.
Nahibaluan nga ang Stetson International Environmental Moot Court Competition ang pinakadako kag pinakaprestihiyoso nga moot court sa kalibutan kag nagatutok sa mga isyu kag pagpanghangkat angot sa environment.
Ang moot competition ukon moot court isa ka simulated appellate court proceeding kun sa diin nagabayluhanay sang mga argumento ang mga law students tuhoy sa mga hypothetical legal cases kag nagalakip sang pagbalay sang written submissions (memorials) kag pagpresentar sang oral arguments sa atubang sang mga huwes.
