Wala sang rason nga dapat patihan nga may yara sang nagapang-recruit nga myembro sang rebelde nga grupo sa West Visayas State University.
Ini ang sabat ni Dr. Joselito Villaruz, presidente sang nasambit nga unibersidad may kaangtanan sa nangin pahayag sang self-confessed former rebel kag subong government whistleblower nga si Jeffrey Celiz nga gin-recruit siya sang rebelde nga grupo sang siya ang kabahin sang Forum Dimensions — ang school publication sang West Visayas State University.
Sa interview sang Bombo Radyo kay Dr. Villaruz, iya ginpahayag nga may mga apprehensions kag anxiety ang mga estudyante sang unibersidad bangud mahimo nga i-angot sila sa rebelde nga grupo sa ginpaguwa nga pahayag ni Celiz.
Suno kay Villaruz, sa pagpungko niya bilang presidente sang West Visayas State University, wala siya sang may nakita nga mga aktibidad nga masiling kahimuan sang rebelde nga grupo.
“Well informed” kag “critical thinkers” ang mga estudyante sang unibersidad pahayag sang presidente kag indi buot silingon nga sila ang lunsay mga leftist ukon kabahin sang makawala nga grupo.
Ginasiguro man ni Dr. Villaruz sa publiko nga ang West Visayas State University ang indi “breeding ground” sang makawala nga grupo.
