ILOILO CITY – Napun-an sang pagpasalamat ang duha ka graduates sang West Visayas State University-Main Campus nga nalakip sa topnotchers sa September 2024 Librarians Licensure Exam.
Ini amo sanday Melgie Gabasa Pacardo nga rank no. 6 kag John Albert Baisa Gayatinea nga rank no. 7.
Nakakuha si Pacardo sang 87.90% nga rating samtang si Gayatinea naman ang may 87.65%.
Sa record sang Professional Regulation Commission (PRC), kabug-usan nga 771 ka graduates ang nagkuha sang pasinawan sang Septyembre 2024 kun sa diin 376 sa bilog nga pungsod ang nakapasar ukon may katumbas nga 48.77%.
May yara naman sang 100% nga rating ang nasambit nga unibersidad matapos lunsay nakapasar ang 14 nila ka mga alumni.
Sa interview sang Bombo Radyo kay Gayatinea sang Barangay Tanza Esperanza, Iloilo City Proper, iya ginpahayag nga tubtob subong yara pa siya sa state of shock matapos nag-rank no. 7 sa pasinawan.
Gin-ako man sini nga nangin dako nga pagpanghangkat ang pandemya sa iya pagtuon, apang nagapasalamat ini bangud nalampuwasan niya ini.
Suno kay Gayatinea, ang nagtulod sa iya agud magkuha sang kurso nga Bachelor of Library and Information Science (BLIS) amo ang pagkahilig sini sa pagbasa sang libro sa iya ekwelahan kag sa ila simbahan.
Samtang, suno naman kay Pacardo sang Barangay Gemumua-Agahon, Passi City, indi malikawan nga madamo sang mga nagapakanubo sa iya ginakuha nga kurso ilabi na nga indi ini tuman ka kilala.
Apang luyag sini nga pamatud-an nga ang isa ka librarian ang wala lang nagapungko o naga-ugtas sa library kundi nagatutok sa isa ka mabudlay nga trabaho.
