ILOILO – Nanindugan ang pamunuan sang West Visayas State University (WVSU) nga wala sang kamatuuran ang pahayag sang Philippine National Police (PNP) nga may nagakatabo nga recruitment sang Communist Party of the Philippines-New People’s Army (CPP-NPA) sa ila external campus sa Calinog, Iloilo.
Sa interview sang Bombo Radyo kay Dr. Joselito Villaruz, university president sang West Visayas State University, iya ginpahayag nga nagpatigayon sila sang imbestigasyon matapos nag-atubang sa hearing sang Senate committee on public order and dangerous drugs nga ginapamunuan ni Senator Ronald “Bato” dela Rosa si Colonel Randy Arceo, Directorate for Operations sang PNP sa diin ginpahayag sini nga may mga recruitment sang rebelde sa mga eskwelahan kag unibersidad sa diin target ang mga estudyante.
Diri kag ginpahayag ni Arceno nga isa ang WVSU-Calinog Campus sa 102 ka mga educational institutions sa pungsod nga ginapahayag may nagakatabo nga recruitment sang rebelde humalin pa sang 2014.
Suno kay Villaruz, maathag nga wala sang basehan ang pahayag ni Arceo bangud mangin ang mga pulis sa Calinog, Iloilo ang makapamatuod nga wala sang nagakatabo nga recruitment sang mga rebelde sa ila external campus.
Ginpahayag sini nga makaduluda ang ginakaptan nga dokumento ni Arceo kag maathag nga wala ini na-verify sang maayo.
Nagpanawagan man si Villaruz nga imbestigaran sang pulis sang maayo ang nasambit nga issue kag indi basta lang magtudlo sang mga educational institution nga wala sang mabakod nga ebidensya.
