ILOILO CITY – Isa-isa nga ginsabat sang pamunuan sang West Visayas State University (WVSU) ang isyu kag mga palamangkutanon kaangot sa paghatag sang titulo nga Honoris Causa Doctor of Laws degree kay First Lady Atty. Liza Araneta-Marcos.
Sa interview sang Bombo Radyo Iloilo kay Dr. Joselito Villaruz, presidente sang West Visayas State University, iya gin-athag nga nag-agi sa husto nga proseso ang paghatag sang Honoris Causa sa First Lady.
Suno kay Villaruz, aprubado mismo ang paghatag sang Honoris Causa sa First Lady nanday Legal Education Board Chairperson Atty. Jason Barlis, Commission on Higher Education (CHED) Chairman Prospero “Popoy” De Vera kag sang Board of Regents sang unibersidad.
Sa ginpadala nga Statement sang Legal Education Board sa iya, nasaad sa Section 2(a) sang LEB Memorandum Order No.9 Series of 2017, nga ang West Visayas State University ang 38 ka tuig na nga isa ka higher educational institution kag sulod sa 25 year requirement sa paghatag sang Honoris Causa.
Sang gin-nominate naman ang First Lady, indi na siya incumbent nga Faculty member sang awarding institution gani mahimo ini magbaton sang Honoris Causa nga indi mahimo ihatag sa mga incumbent nga administrators, faculty, staff.
Gin-athag man sini nga deserving ang First Lady sang Honoris Causa bangud sa iya dedikasyon sa public service kag advocacy para sa legal education.
Suno sa iya, humalin sang nagtudlo ang first lady sa unibersidad, nagdala ini sang madamo nga mga proyekto kag programa nga makabulig indi lang sa mga Law students kundi mangin sa iban pa nga mga estudyante.
Mangin ang tukuron nga bag-o nga College of Law building suno sa natungdan ang inisyatibo man sang First Lady.
Nahibaluan nga nakuha sang First Lady ang iya nga law degree sa Ateneo de Manila University sang 1985 kag nag-enroll man sa post-graduate classes sa Criminal Procedure sa New York University.
Ang First Lady man ang founding partner sa Marcos, Ochoa, Serapio & Tan (MOST) law firm.
Apang sang nagdaug si Presidente Ferdinand Marcos Jr., temporaryo anay ini nga nag-untat sa iya nga propesyon bilang abogada agud tungdan ang iya nga papel bilang First Lady.
Nangin ikaduha naman sini nga puluy-an ang Iloilo City bangud diri ginbun-ag ang amay sini nga si late Filipino Olympian Manuel “Manolet” Ledesma Araneta Jr.
