𝗜𝗟𝗢𝗜𝗟𝗢 𝗖𝗜𝗧𝗬 — Ginkadismaya sang Western Visayas Transport Cooperative (WVTC) ang nangin pahayag ni Senate President Francis “Chiz” Escudero kag Senator Raffy Tulfo kaangot sa pagpauntat sang implementasyon sang gobyerno sang Transport Modernization Program (TMP).
Sa interview sang Bombo Radyo kay Halley Alcarde, Vice President sang Western Visayas Transport Cooperative, iya ginkwestyon kon ngaa subong lang nagpamalabag ang mga senador apisar nga yara naman sila sa nag-agi nga mga administrasyon.
Suno kay Alcarde, tatlo na ka tuig sugod sang nagpungko si President Ferdinand Marcos, Jr. kag kon sa diin nga yara na sa midterm elections, idto lang kag naghulag ang mga senador batok sa programa.
Gin-athag man sini nga kon may mga korapsyon nga tuyo untaton sang mga senador sa operasyon sang mga kooperatiba, kontani, amo lang na ang tutokan kag indi na paghilabtan ang bilog nga programa nga gin-umpisahan pa sang 2017.
Ginpatpat man sang natungdan nga ang gobyerno man mismo ang nagmandu sa ila agud nga mag-uyang sang tyempo agud mapatuman ang modernisasyon sa transportasyon.
Ginpangita man ni Alcarde ang mga gintanyag nga mga local assemblers sang modernized jeep agud nga mangin barato, kon sa diin, tubtob subong wala sa gihapon may ginpakita ang gobyerno.
