ILOILO CITY — Ginreklamo sang pila ka mga anay myembro sang Western Visayas Transport Cooperative (WVTC) ang pamunuan bangud sa issue nga intransparency.
Sa interview sang Bombo Radyo kay Concepcion Antenor, jeepney operator, iya ginpahayag nga sugod sang bulan sang Marso tubtob subong, wala sa gihapon matapos ang dokumento nga kuntani makaproseso sang ila paghalin sa kooperatiba.
Suno kay Antenor, wala man sang financial report nga ginaplastar ang kooperatiba sa kada general assembly nga ginahiwat.
Ginpahayag man sini nga lunsay mga chairman lang sang kooperatiba ang makabenepisyo sang mga programa sa diin napabay-an na ang mga drivers kag operators.
Ginpalamalaut naman sang natungdan ang pagtabog sa ila sang kooperatiba sang sila ang nagpadulong sa opisina agud magproseso sang mga dokumento.
Nagpaathag man ang natungdan nga wala sila nagapamatok sa programa sang gobyerno nga Public Utility Vehicle (PUV) modernization apang may mga indi maayo nga nagakalatabo sa ibabaw nga dapat insaktohon.
Ginsabat naman sang Western Visayas Transport Cooperative (WVTC) ang reklamo nga ginabato sang mga nag-withdraw nga operators sa ila nga kooperatiba.
Sa interview sang Bombo Radyo kay Raymundo “Boyet” Parcon, presidente sang nasambit nga kooperatiba, iya ginpahayag nga wala sila sang may ginpaguwa nga operators nga nagpadulong sa ila talatapan.
Suno kay Parcon, naghingyo sila nga indi magtingob sulod ang mga nagareklamo nga operators bangud nga nagagutok sa opisina.
Ginpaathag man sang natungdan nga bukas ang ila talatapan sa mga drivers kag operators agud i-check ang transparency report sang ila kooperatiba.
