Ginkadismaya sang Western Visayas Transport Cooperative ang gindugang nga P2 nga plete para sa mga mini bus sang Land Transportation Franchising and Regulatory Board.
Sa interview sang Bombo Radyo kay Raymundo ”Boyet” Parcon, Chairperson sang Western Visayas Transport Cooperative, iya ginpahayag nga tuman ka kulang para sa ila nga mga transport cooperative ang ini nga pagdugang sang plete.
Suno pa sa iya nga doble ang ginsaka sang gatong nga ila ginatughong sa ila mga modernized jeepney kag nagapangabay sila nga kuntani P7 ang idugang nga plete, samtang P6.50 centavos naman para sa mga traditional jeepney.
Nagaplano man ang ila grupo nga magapatigayon sila sang pagpaalinton sa Department of Transportation agud mapamatian man ang ila panawagan nga taasan pa ang plete.
Suno pa sa iya nga kun indi pag-aprubahan sang DOTr ang ila nga hingyo, mapilitan gid sila nga i-porsyento na lang ang pagbyahe sa syudad.
Dugang pa ni Parcon nga gusto man kuntani sang mga drivers nga magserbisyo sa pumuluyo apang nabudlayan gid sila kag nagapangayo man sila sang bulig halin sa gobyerno.
