𝗜𝗟𝗢𝗜𝗟𝗢 𝗖𝗜𝗧𝗬— Hugot nga nagapanindugan ang Western Visayas Transport Cooperative (WVTC) nga isa ka hapaw ang ginhimo sang mga senador nga resolusyon kaangot sa pasuspendi sang Public Transport Modernization Program (PTMP) sang pungsod.
Sa interview sang Bombo Radyo kay Mr. Halley Alcarde, General Manager sang Western Visayas Transport Cooperative (WVTC), iya ginpahayag wala lang sang kongkreto nga ginhatag nga eksplanasyon ang senado kon ngaa pauntaton ang modernisasyon apisar nga nakasugod na ang mga kooperatiba sang amo nga programa.
Suno kay Alcarde, isa ang Iloilo sa gilayon nagtuman sang programa nga ginmandu man sang gobyerno kag sa karon, gobyerno man mismo ang magapauntat diri.
Ginpahayag man sini nga may yara sang kabug-usan masobra 500 ka mga modernized units ang naga-operate sa syudad kag probinsya sang Iloilo.
Ginpakamalaut man sini ang suspension sang modernisasyon bangud may palaaboton kontani nga 181 ka mga bag-o nga modernized units.
Una na nga ginpahayag sang kooperatiba nga masakit ini para sa ila bangud sa 95 ka units nga yara sa idalum sang Western Visayas Transport Cooperative, naglab-ot sa P200 million ang ila nangin utang agud mabakal lang ang mga modernized jeepneys.
