Samtang may mga pila ka transport groups nga nagahingyo sang inadlaw nga sweldo, nagapadayon naman ang Western Visayas Transport Cooperative (WVTC) sa pagpatuman sang weekly nga sweldohanay bangud ini, suno sa ila, ang mas epektibo para sa mga driver kag konduktor.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA) kag chairperson sang WVTC, ginpahayag sini nga kada Sabado ginabaton sang mga empleyado ang ila sweldo, kag wala man sang reklamo gikan sa ila.
Suno sa iya, indi sila mag-adopt sang inadlaw nga sweldo bangud sa risgo nga may pila ka driver nga nagabisyo, kag posible nga indi na makaabot sa panimalay ang ila kita.
Gindugang ni Parcon nga ang ila polisiya, para gid sa pamilya, indi lang para sa driver mismo.
Suno pa sa iya, may yara sila sang incentives nga ginahatag, kag ang daily rate nagalab-ot sa ₱733 para sa driver kag ₱533 para sa konduktor, wala pa nadala ang ila overtime pay.
Ginpaathag man ni Parcon nga padayon ang implementasyon sang Anti-Sardinas Policy, nga nagatuyo nga malikawan ang pagginutokanay sang pasahero sa sulod sang mga unit agud mapasiguro ang comfort kag kaluwasan sang tanan.
