Posible nga lima na lamang ka units kada ruta sang Western Visayas Transport Cooperative (WVTC) ang magabyahe umpisa subong nga adlaw bangud indi na masarangan sang mga ini ang padayon nga pagsaka sang presyo sang gatong.
Sa interview sang Bombo Radyo kay Raymundo “Boyet” Parcon, chairman sang WVTC, iya ginpahayag nga padayon ang pagkalugi sang ila kooperatiba amo man sang mga driver bangud sa nagakatabo nga krisis sa gatong.
Suno kay Parcon, nagakadugangan ang kabudlayan sang ila operasyon ilabi na kun pigado ang byahe kag magamay ang pasahero nga nagasakay, rason nga mapilitan na lang ang mga ini nga gamayon na lang ang nagabyahe sa ila kooperatiba.
Ginpabutyag man sini nga tubtob subong wala gihapon nakaabot ang ginpangako nga ayuda sang gobyerno kag kaangay nga ginapabungol-bungolan na lamang ang ila pangabay nga dugangan man kuntani ang plete.
Dugang pa sini, naga-lab-ot na sa masobra P5,000 ang ila ginagasto sa gasolina kada adlaw, wala pa dala ang sweldo sang mga driver kag iban pa nga operational expenses, rason nga dako ang ila kapierdehan kun indi nila malab-ot ang ila qouta.
Nagapanawagan man ang mga ini sa gobyerno nga hatagan sang bulig ang ila sektor agud malikawan ang mas madamo pa nga unit nga madula sa kalsada kun sa diin mas maapektuhan pa ang mga commuters.
