Apisar sang madamo pa nga mga ipreparar kag adjustments, preparado na ang Western Visayas Transport Cooperative subong nga epektibo na nga ipatuman ang fare hike ukon pagsaka sang plete sa pampubliko nga mga salakyan.
Ini matapos naaprubahan na sang Department of Transportation ang nangin rekomendasyon sang Land Transportation Franchising and Regulatory Board sang Setyembre 25.
Kasunod ini sang panawagan sang transport sector nga ipatuman ang fare hike ilabi na nga mataas sa gihapon ang presyo sang produktong petrolyo.
Sa interview sang Bombo Radyo kay WVTC Chairman Raymundo ‘Boyet’ Parcon, iya ginpahayag nga madamo pa sila sang kinahanglan nga ipreparar kag adjustments matapos ang nangin pagbag-o sa pamasahe nga gin-anunsyar lang sang nagligad nga semana.
Kabahin diri amo ang wala pa mapaskil ukon maplastar ang panibag-o nga fare matrix sa modernized jeepneys subong nga wala pa ini mahatag sang LTFRB Region 6.
