Gin-aresto sang mga pulis ang social media personality nga si Xander Ford sa isa ka restaurant sa Pasay City.
Ini ang ginkumpirma man sa Facebook live sang Star Image Artist Management nga amo ang talent management ni Xander.
Yara subong sa isa ka presinto sa Tondo, Manila si Xander (ukon Marlou Arizala ang matuod nga pangalan) bangud sa arrest warrant may kaangtanan sa kaso nga ginpasaka sang iya nga anay nobya.
Sa warrant of arrest nga ginpagwa sang Manila Regional Trial Court Branch 38, ginpasakaan sang kaso si Xander bangud sa paglapas sa RA 9262 ukon Violence Against Women and their Children.
Kun matandaan, nagreklamo ang anay nobya ni Xander bangud sang ginaalegar physical abuse kag sexual assault nga ginhimo ni Xander sang sila ang nagaupdanay pa.
Ginpahayag man sang management nga kun mapamatud-an sa korte nga may sala si Xander, dapat siya nga manabat bangud indi sila magkunsinti sa iya.
Nagaapelar subong ang talent agency nga indi anay pag-ijudge si Xander samtang wala pa man natapos ang hearing sa korte.
May indefinite suspension nga ginpapanaug kay Xander kag wala anay sang ihatag nga project sa iya samtang wala pa natapos ang kaso.
Plano sang kampo ni Xander nga magpiyansa sang P18,000 subong nga adlaw para sa iya temporaryo nga kahilwayan.
