Pangaluyagan ni Chinese President Xi Jinping ang mga pungsod sa Southeast Asia kasunod sang indi mauntat nga away sang China kag Estados Unidos sang Amerika sa taripa.
Sandig sa Chinese foreign ministry, bisitahon ni Xi ang Malaysia, ang Vietnam, kag ang Cambodia nga amo man ang iya una nga overseas trip subong nga tuig.
Magabisita siya sa tatlo ka pungsod sa tuyo nga ipabatyag ang importansya sang rehiyon suno kay ministry spokesman Lin Jian. Target sang Beijing nga ipresentar ang kaugalingon bilang estable nga alternatibo sa United States of America kasunod sang nangin anunsyo ni US President Donald Trump nga magapatuman ini sang daku nga taripa sa mga exports sang mga pungsod.
Bisan nga ginbaliskad naman ang desisyon ni Trump kag bisan may yara na sang ginpangbawi sa iya anunsyo, nagsiling si Chinese Commerce Minister Wang Wentao nga ang desisyon sang Amerika sa taripa ang makahalit sa developing countries.
Nahibaluan nga ang 10-member Association of Southeast Asian Nations (ASEAN) amo ang pinakadaku nga nagabaton sang Chinese exports sang nagligad nga tuig santo sa record sang Chinese customs authority.
Matandaan nga ginpasaka ni Trump sa 145% ang taripa sa Chinese goods apang may exemption sa consumer electronics kaangay sang smartphones kag computers.
