ILOILO CITY – Ginpaathag sang Energy Regulatory Commision nga indi manami nga indikasyon ang masami ginagpagwa sang National Grid Corporation of the Philippines nga yellow alert status.
Sa interview sang Bombo Radyo kay Atty Joel Bontuyan, director sang Energy Regulatory Commision Visayas, iya ginpahayag nga mahimo lang nga magapagwa sang alert status kun may problema ang trasmission lines ukon ang power plant.
Suno kay Atty Bontuyan, magadepende sa power supply ang pagbutang sang alert status sa diin ginakabig ang yellow alert status nga critical, samtang ang red alert status naman ang ‘worst’.
Ginpahayag dugang sang natungdan nga posible ang pagpataas sang alert status ang nagresulta sa kakulang sang power supply bangud may yara sang problema sa linya.
Sa matuod suno kay Bontuyan, mahimo lang magpagwa sang alert status kun may yara sang power plant nga nag-offline, yara sa idalom sang preventive maintenance, ukon may yara sang unforeseen events halin sa generation sector.
Ginpakigbahin man sang direktor nga may yara sang bastante nga power plants ang Panay Island sa diin mas mataas ang reserve capacity sini kun ipaangid sa peak demand sang iban nga lugar.
Samtang, nahibaluan nga may yara ang Panay Island sang masobra sa 700 megawatts nga power supply halin sa generating power plants.
