ILOILO CITY- Wala ginadula ni Iloilo 2nd District Representative Mike Gorriceta ang posibilidad nga may mga kinamatarung sang mga tawo nga mahimo malapas sa tion nga mangin isa na ka layi ang House Bill 6875 ukon Anti-Terrorism Bill nga pasado na sa third and final reading sa Kamara.
Si Gorriceta ang isa sa 173 ka mga mamalidha nga nagpabor sa hagna nga ginkontra sang 31 ka mamalidha kag 29 ang nag-abstain.
Sa interview sang Bombo Radyo Iloilo kay Cong. Gorriceta, iya ginpahayag nga “YES but with reservation” ang iya boto sa hagna bangud nakit-an sini nga mahimo abusuhan ini sang otoridad kag kalabanan nga mangin biktima sini ang mga imol.
Suno sa mamalidha, apisar tuman ka pag-on ang Anti- Terrorism billa batok sa mga Abu Sayyaf kag iban pa nga mga organisado nga terorista nga grupo, delikado ini sa gihapon bangud mahimo dakpon ang mga ordinaryo nga sibilyan apisar nga masal-an lang nga terorista kag mahimo pa nga mapreso sang 14 tubtob 24 ka adlaw.
Ginasigahum naman sang mamalidha nga mahatagan pa sang tiempo sang Senado kag Kamara nga maistoryahan ini dugang agud mahingagaw pa nga maislan ang mga probisyon nga para sa iya wala nagasanto sa konstitusyon.
Samtang , gin-athag sang natungdan nga indi siya ang principal author sang Anti- Terrorism Bill baliskad sa naggwa nga impormasyon nga isa ini sa mga principal authors.
Sa interview sang Bombo Radyo Iloilo kay Gorriceta, iya ginpahayag nga wala ini nag-signify bilang principal author kag nakibot na lang ini bangud wala man siya nakapadala sang letter of intent para diri.
Suno kay Gorriceta, gilayon man niya nga ginhingyo nga kakson ang iya pangalan antes pa man ang pagbinotohay sa Kamara sa nasambit nga hagna.
