Nagpaandam si House Speaker Martin Romualdez nga ilisipon na lang ang adlaw sang mga nagamanipula sa presyo sang bombay kag ahos sa merkado.
Suno kay Romualdez, nakabaton siya sang impormasyon nga may naga-hoard sang bombay kag ahos agud nga makatuga sang artificial scarcity sa suplay kag amat-amat nga mapasaka ang presyo.
Suno sa mamalidha, apisar padayon ang harvest season kag ang pagsulod sang imported onions, mataas gihapon ang presyo sini nga mga produkto.
Ginmanduan na ni Romualdez ang House Committee on Agriculture and Food sa pagpamuno ni Quezon 1st district Rep. Wilfrido Mark Enverga nga magpatigayon sang imbestigasyon kag kun may mga makit-an nga ebidensya, dapat nga ipasaka ang nagakaigu nga kaso-kriminal.
Isa ini ka sahi sang economic sabotage suno pa sa opisyal.
Tun-an man sang house panel suno sa iya ang option nga i-rekomendar sa presidente ang calibrated importation sang onion and garlic bilang paagi agud mapwersa ang pila ka indibidwal agud i-unload ang ila stocks kag agud nga mapanubo na ang presyo.
Kun madayon man ini nga calibrated importation suno sa iya, dapat indi sini mabutang sa alang-alang ang ikaayo sang local farmers.
Magluwas sa imbestigayon, luyag man ni Romualdez nga may daily monitoring sang presyo sang ahos kag bombay sa merkado. ##
