Gin-manduan sang grupo sang mga pamatan-on ang Department of Education (DepEd) nga akuon nga ang sistema sang edukasyon sang pungsod ang indi pa handa para sa distance learning bangud sa COVID-19 pandemic.
Ang ginatumod sang Samahan ng Progresibong Kabataan (Spark) amo ang mga issues nga gin-diskusyonan sa natabo nga hearing para sa 2021 budget sang DepEd sa House of Representatives’ Committee on appropriations kaangay sang admissions gikan sa opisyales nga kinahanglan mag-share sang modules ang mga estudyante bangud sa budget restrictions.
Suno sa nasambit nga grupo, sa baylo nga pamatud-an sang ahensya nga handa ini magbukas sang klase sa Oktubre 5, ang session ang nagpamatuod nga indi gid handa ang DepEd kag ang pungsod nga magbukas sang klase.
Dugang pa sang grupo, delikado para sa mga estudyante ukon ginikanan nga magkadto pa sa ekswelahan agud magkuha sang learning materials bangud wala man gani sang natalana nga pondo para sa COVID-19 testing sa mga estudyante kag manunudlo.
Academic freeze ang ginaduso sang grupo para sa school year 2020 tubtob 2021 agud nga mahatagan anay sang ligwa ang mga pamilya nga maka-recover gikan sa epekto sang pandemya kag agud man nga malikawan ang stress sa estudynte nga indi makasarang sang distance learning.
