Ginapamatukan sang Sangguniang Kabataan (SK) Federation of Iloilo City ang panawagan nga i-abolish ini nga youth council.
Ini kasunod sang suhestyon ni Department of Interior and Local Government (DILG) Secretary Jonvic Remulla nga dulaon na lang ini bangud madamo man sa mga katapo sini ang absent sa official meetings kag manubo man ang lebel sang partisipasyon.
Apang suno naman kay SK Iloilo City Federation President Jelma Crystel Implica, kun dulaon ang SK, madulaan man sang tingog ang kabataan sa ila nga mga problema kag sa ila nga adbokasiya.
Sa baylo nga abolition, ginapanugyan ni Implica sa national agencies nga pabaskugon pa ang mga mekanismo nga amo ang maga-promote sang productivity kag accountability sa SK leaders.
“We would like to call on DILG and other agencies to really strengthen ang aton nga mga measures and obligations para sa mga kabataan, para nga mas maging productive kag ma-apply gid nila ang ila mga ulubrahon sa ila tagsa ka barangay,” paathag sini.
Sa interview naman sang Bombo Radyo kay Mark Bryan Pandes, ang SK Federation President sang Concepcion, Iloilo, iya ginpahayag nga indi sabat ang pag-abolish sa Sangguniang Kabataan.
Pahayag sini, madamo man sila sang serbisyo, programa, kag proyekto, kag ang kinahanglan sang kaangay nila nga youth council amo ang intervention para nga mas mangin epektibo pa gid sila sa implementasyon.
“I am not in favor of abolishing the Sangguniang Kabataan. Madamo man sang SK that we are performing their jobs, we are able to provide services, programs, and projects for the youth. Instead nga i-abolish ang SK, I think it is very necessary nga mag-provide kita sang interventions, we have to establish programs that actually enhance sang mga SK in order for them to effectively implement sang mga program,” pahayag sini.
Suno naman kay Brylin Dorias, Vice President sang SK Federation sang Victorias City, Negros Occidental, pananglitan dulaon gid man ang youth council, may iban pa man nga paagi kun paano makabulig gihapon ang mga youth leaders sa ila nga komunidad.
Matandaan nga kadungan sang suhestyon sang DILG Chief, ginplastar sini nga isa ka tuig matapos ang SK elections, 60% lamang sang youth leaders ang nagatambong sa meetings kag ang attendance ang nag-us-os pa sa 30 percent pagkasunod nga tinuig.
“Those absences lead the barangay captain to impose his will on the council… The youth councils would be better if [they] were constituted by the captain themselves, and having a non-performance [be] replaced immediately,” kabahin pa sang pahayag sang tiglikom.
Ginkontra naman ini ni Assistant Minority Leader kag Kabataan Partylist Representative Renee Louise Co.
“Don’t blame the kids! Sino bang ang matagal nang nasa kapangyarihan at nagpapanatili sa bulok na sistema para sa pansariling ganansya?,” pahayag sang bataon nga kongresista. “The youth are not the problem—they are the victims of a corrupt political system that has deliberately excluded and marginalized them.”
