ILOILO CITY – Todo ang kampanya sang mga environmental group sa pagtipig sang palibot ilabi na nga ginasaulog subong nga bulan sang Hunyo ang Philippine Environment Month.
Sa interview sang Bombo Radyo kay Daniel Agan, chairman sang Youth Proyekto Philippines, iya ginpahayag nga indi lamang kun tani sa bulan sang Hunyo ginadumdum ang Philippine Environment Month kundi dapat nga ini ang ginadumdum sa tanan nga tion.
Ang pagtipig sang palibot kag dunang manggad ang dapat nga mangin kabahin na sang pagpangabuhi sang tawo sa baylo nga ini ang pabay-an.
Sa subong suno kay Agan, indi man mahinago nga isa sa mga dapat mahatagan sang solusyon amo ang environmental problems rason nga igalunsyar sang ila grupo amo ang ‘MaharliKalikasan’ nga kombinasyon sang tinaga nga maharlika kag kalikasan nga nagakahulugan sang pagtipig sa palibot.
Magluwas sa pag-engganyo, ginpahayag ni Agan nga importante nga may yara sang aktu ukon ginahimo ang tagsa ka tawo agud nga masolbar ang mga nanari-sari nga environmental problems.
Lakip sa mga proyekto sang nasambit nga grupo amo ang pagpahagan-hagan ang plastic nga basura rason nga ila gid nga ginaduso ang eco-bricks ukon ang mga water bottle nga ginsudlan sang plastic wrapper.
Ang eco-bricks ang ginagamit bilang alternatibo nga hollow blocks.
May kaangtanan diri, igalunsyar sang ila grupo kaupod ang partner agencies ang ‘MaharliKalikasan’ sa Hunyo 27 tubtub 28 sa Bucari, Leon, Iloilo.
May yara man sang patigayunon nga mga nagkalain-lain nga aktibidad nga nagapakita sang pagtib-ong sa pagtipig sang palibot.
