Wala gintugutan sang gymnast nga si Carlos Yulo kag pole vaulter nga si EJ Obiena nga maagaw ang ila tagsa ka gold medal nga ginauyatan sa Southeast Asian Games.
Sa bahin sang two-time world champion nga si Yulo, nangibabaw ini sa men’s individual all-around matapos naka-tally sang 84.000 points sa Olympic Stadium.
Ini na ang ikatatlo nga individual all-around gold medal ni Yulo sa SEA Games matapos nadag-an man ini sang 2019 kag sa Hanoi, Vietnam sang nagligad nga tuig.
Subong nga adlaw, magapasundayag liwat si Yulo para sa finals sang individual apparatuses kag posible mag-compete sa vault kag parallel bars depende sa desisyon sang coaches.
Nahibaluan nga may restriction nga ginbutang ang Cambodian organizers kag tubtub lamang sa apat ka medalya ang mahimo mabulsa ni Yulo.
Ang nasambit nga Pinoy gymnast ang ginkilala nga most bemedalled Filipino athlete sa Hanoi SEA Games sang 2022 nga may lima ka gold medals.
‘STILL THE POLE VAULT KING IN SOUTHEAST ASIA’
Samtang sa bahin sang isa pa ka Olympian nga siObiena, wala lang ini nagdaog sang gold medal kundi ginguba kag ginlapawan pa ang kaugalingon nga SEA Games record!
Apisar sang ulan, natigayon nga na-clear ni Obiena ang 5.65-meters sa men’s pole vault sa Morodok National Stadium kag ginbulsa ang iya ikatatlo nga gold medal sa SEA Games.
Plano man sang nasambit nga World No. 3 pole vaulter nga ipa-auction ang gingamit nga sapatos sa amo nga event agud nga makadugang sang pondo para sa pole vault facility sa Tuguegarao City. Ini nga pasilidad ang ginalantaw ang lugar kun sa diin makahanas ang mga bata para sa pole vault.#
