ILOILO CITY- Ginakilala sang chairman sang Committee on Health sang Iloilo City Council ang dako nga papel nga gintungdan sang Bombo Radyo Iloilo sa kampanya sang syudad batok sa dengue hemorrhagic fever.
Sa interview sang Bombo Radyo kay Councilor Alan Zaldivar, iya ginpahayag nga humalin sang nagsugod ang kampanya sang siyudad sa pagtinlo sang palibot, nangin aktibo ang Bombo Radyo bilang official media partner sa pagpalapnag sang impormasyon.
Suno kay Zaldivar, nangin epektibo ang Bombo Radyo sa kampanya agud nga maganyat ang pumuluyo nga magpakigbahin sa mga clean-up drive sa palibot sang syudad sang Iloilo.
Suno pa sa iya, bangud sa bulig sang Bombo Radyo sa Iloilo City Government, nagresulta ini sa pagnubo sang numero sang kaso sang Dengue Hemorrhagic Fever.
Nahibaluan nga nagpatigayon subong nga adlaw sang “Ugsaran Tinlu-an Agud Balati-an Malikawan” ang Iloilo City Government sa Molo Plaza kag sa mga kaiping nga mga barangay bilang tikang agud batian ang dengue kag iban pa nga balatian subong nga tig-ululan.
